دیرنیش
آزربایجان میلّی دیرنیش تشکیلاتینین ۱۹-جو قورولوش ایل دؤنومو موناسیبتی ایله تشکیلات سؤزچوسو، مجید جوادی آراز-ین مئساژی
«آزربایجان میلی دیرنیش تشکیلاتی»نین ۱۹-جو قورولوش ایل دؤنومو گونلرینی ایدراک ائدیریک. ۱۹مارت ۲۰۰۶ ایلینده (۲۸ حوت/اسفند ۱۳۸۴) آزربایجان میلی دیرنیش تشکیلاتی یورد ایچینده قورولوش بیلدیریشینی یایدی و رسماً قورولموش اولدو.
قورولوش بیلدیریشینده ده وورغولاندیغی کیمی، «آزربایجان میلی حرکتی»نین بیر پارچاسی و آلت بیریمی اولاراق قورولان «دیرنیش تشکیلاتی» بیر تاریخی ضرورت نتیجه‌سینده اورتایا چیخدی. بو تشکیلاتین قورولوشو بیر قرندن بری آیری سئچکیلیک، آشاغیلانما، یوخ سایما و یوخ ائتمه سیاستلری ایله و قیساجاسی شونیزم، فاشیسم و استعمارلا ال به یاخا اولان بیر خالقین طبیعی تپکیسی ایدی. بیر خالق کی ۱۹۰۵ مشروطه انقلابیندان اعتباراً آزادلیق، عدالت و اؤز مقدراتینا حاکیم اولماق اوچون دفعه‌لرله آیاغا قالخیب عوصیان بایراغی قالدیرمیشدی اما هر دفعه‌سینده داها دا قانلی شکیلده باسدیریلمیشدی. ۱۹۹۰-لاردان سونرا اورتایا چیخان و گئد گئده بیر خالق حرکاتیا دؤنن آزربایجان میلی حرکتی، بابک قالاسی قورولتایلاری و کاریکاتور آیاقلانماسی کیمی تجروبه‌لری گئریده بوراخمیش و آرتیق سیستملی و اصولی بیر سیاسی موجادیله احتیاجی اؤزونو گؤسترمیشدی. دیرنیش تشکیلاتینین قورولوشو بو احتیاجا وئریلمیش بیر جواب ایدی.
هر نه قدر آرتیق سیستملی سیاسی موباریزه احتیاجی اؤزونو حیس ائتدیرمیش اولسا دا بیر رئاللیق وار ایدی کی گرچکدن میلی حرکتین امکانلاری سون درجه قیسیتلی و دار ایدی. اونون اوچون ده دیرنیش تشکیلاتی حقیقتاً یوخ دئییله بیله‌‌جک قدر آز امکانلار ایله قورولدو. الده اولان تک شئی «قوروجولار هئیتی»نین یولونا اولان سارسیلماز اینانجی و قیریلماز ایراده‌سی ایدی. اونلار بؤیوک فداکارلیق و اؤزوئری ایله دیرنیش تشکیلاتینی یوخ امکانلارلا وار ائتدیلر و آزربایجان میلی حرکیتنده گلجگه دوغرو بیر جیغیر آچدیلار. یئری گلمیشکن دیرنیش تشکیلاتینین قورولوشندا بؤیوک امگی اولان، دیرنیش تشکیلاتینین «بؤیوک بَی»ی، دیرنیش سیمگه‌سی رحمتلیک «عزیر بی پورولی»نی سایغی و اؤزلمله آنیرام. نه یازیق کی آرامیزدان چوخ تئز آیریلدی و آرامیزدا هر زامان یئری گؤروندو.
اما سئویندیریجی حالدیر کی دیرنیش تشکیلاتی اصلی میسیونلاردان بیری اولان کادر یئتیشدیرمک گؤروینی یئرینه گتیردیگی اوچون بوگون عزیز بیلر آرامیزدا اولماسالار دا اونلارین زحمتلری سایه‌سینده تشکیلاتیمیزین ایکینجی و اوچونجو نسل کادرلاری عرصه‌یه چاتیبلار.
نه ایسه کی، دوشه قالجا گلدیگیمز، اما آیاقدان دوشمه‌دیگیمیز، هر بیر سهویمیز و نؤقصانیمزدان درس چیخارتدیغیمیز بو یولدا باشارلاریمیز و ناییلیتلرمیز ده آز اولمادی. بوگون ایران آدیلا تانینان اؤلکه‌ده «تورک میلتی» آدیندا بیر گرچکلیگین وارلیغی بوتون دونیایا بللیدیرسه و «آزربایجان میلی حرکتی» اولمادان هئچ بیر جیدی دنگه قورولا بیلمیرسه، تورکلوک گرچگی ایران سیاستینه اؤز دامغاسینی وورموشسا و یوز ایللیک آسیمیلاسیون پروژه‌سی ترسینه دؤنمگه باشلاییبسا، طبیعی کی بو میلی حرکتیمیزین بیر ناییلیتی‌دیر و بیزیم ده بو باشاریدا بیر قاتقیمیز اولوبسا نه موتلو بیزه.
اما طبیعی کی داها یولون باشینداییق. میلتمیز یوز ایلدن آرتیقدیر کی آزادلیق، عدالت و اؤز موقدراتینا حاکیم اولماق اوچون موجادیله ائدیر. بوگون موعین باشاریلاریمیز اولسا دا اما حله قارشیمیزدا اوزون و چتین بیر یول وار. حله ملتیمیز اؤزگور دئییل و دوشمنلریمیز بیزدن آزادلیغی و عدالتی اسیرگه‌مک اوچون تورلو تورلو اویونلار قورماغا داوام ائدیرلر و ائده‌جکلر. اونون اوچون ده موجادیله‌میز داوام ائدیر و نهایی ظفره دک ده داوام ائده‌جک.
بو یول اوزون اینجه بیر یولدور، اما بو یول بیزیم یولوموموزدور، گئتمه‌سک ده وارماساق دا بو یول بیزیم یولوموزدور …* یولوندان دؤنمه‌ینلره عشق اولسون …
***
دیرنیش تشکیلاتینین نؤبتی سئچیلمیش سؤزچوسو اولاراق بو وسیله بوتون اویه و سمپاتلاریمیزا ائله‌جه اورگی آزربایجان و تورکلوک اوچون و آزادلیق و عدالت اوچون چیرپینانلارا تشکیلاتیمیزین ۱۹-جو قورولوش ایل دؤنومونو تبریک دئییرم و بیر داها یولوموزا، داعوامیزا و اینانجیمیزا اولان آندیمیزی یئنیله‌ییرم.
یاشاسین آزربایجان
یاشاسین تورک میلتی
یاشاسین آزادلیق عدالت میلی حؤکومت
*تورکیه‌نین آدلیم شاعیرلری آشیق ویسل و احمد قودسی تَجَرین شعرلریندن آلینتیدیر.
آنکارا – 10/03/2025